آخر المواضيع

مقالات سياسية

مقالات فكرية

الأدب

هذربات

قبل لتتفلسف

التدوين شي بعبر عنك أنت. يعني شي بتكتبو بطريقتك لتحكي عن حالك متل ما بتحب. بتحب تكون طفل في لحظة وحابب تكتب عن هالشي بتكتبو. بتحب تكون فيلسوف بتكتبو. المهم يكون الحكي طالع من داخلك ... طالع من قلبك وقناعاتك.

المدونة حيطان بيت قديمة بترسم عليها شو بكون في خيالك بتخربش ... بتسب ... بتحكي حكي وسخ ... واوقات بتحكي حكي كتير كبير.

لما كنا صغار كنا ندون حياتنا على ورق الكتب أو على درج المدرسة. و أوقات كتير على حيطان الحمام. هلأ صرت اعمل نفس الشي بس على النت. والحلو أنو انت بتقدر ما تشوف هالحكي لانو حيطاني الي ... الي انا وبس. بدك تشوف جنوني ادخل وشوف ... ما بدك انت حر.

على كل الأحوال أنا قادر اني اعبر عن حالي متل ما بدي وبطريقتي ... ومو سائل بحد ... حبيت تعابري او ما حبيتها ... حبيت لغتي أو ما حبيتها هذا شي بعنيك أنت وبس.

أنا بقبل النقد أو التصحيح بس بقبلش حد يعلمني كيف أعبر عن حالي ... المقالة بالذات شي بخصني أنا ... حتى القصة بتعبر عني أنا ... أنا بكتب إلي ... بكتب لأعبر عن حالي والناس تشوفني زي ما أنا.

المحصلة الشعب العربي وبالأخص الأردني كتير متفلسف وكتير بحب يعمل حالو بفهم وهو بعرفش يحكي كلمتين. بتمنى اللي بدخل على المدونة يعرف اني مش فاضي للفلسفة ولا للنقد الغبي. لو الك رأي علمي احكي لو في غلط املائي احكيلي ... مش رح اصلحو بس رح اعرف فين بغلط وبتعلم منو.

بصراحة أنا مش نجيب محفوظ ولا بدي اكون ... ولا أنا أفلاطو أو ماركس ولا بدي أكون ... أنا باسل وبحب باسل متل ما هو ببساطتو وعفويتو ... بطفوليتو وأسلوبو الحاد وهجوميتو ... بحب حالي وبحب اطورها متل ما بدي أنا.

بدي أكتب براحتي و أغلط واخبص ... وبدكم تتعلموا أنو تسمعوا غيركم وتتعلموا كيف تتركوا مجال للناس تتعلم.

صراحة احنا شعوب تافهة ومريضة وقاتلة لأي ابداع ... متفلسفين بنحب نظهر على ضهور غيرنا بالنقد والفلسفة اللي ما الها معنى. ولو جيت تقيمنا بتلاقيش فينا شي بستاهل. شعوب فارغة من محتواها ما بتنتلك غير اللسان فقط ... وحتى هذا بتعرفش تستخدموا صح.

بالنهاية حبيت هالحكي ادخل والعب متل ما بدك ... ما حبتيو انت حر ... لا تدخل ولا توجع قلبي لأني بجد رح كون قاسي وردي رح يكون كتير مزعج لأي متفلسف ولكل واحد ما بعجبني ردو.