مهي البلد ما فيها موارد ... مهو احنا عايشين على المعونات الخارجية ... يا زلمة مهو الشعب نفط الحكومة ... هو في بالبلد نفط بس ما بدهم يطلعو

كل يوم بنسمع هاي العبارات وكل يوم بنهز راسنا وبنسكت. غريب الشعب الاردني قديه عندو عزة نفس وكرامة وقديه بنفس الوقت ساكت على حالو ... يعني الواحد فينا بيترك شغلو علشان كرامتو بنفس الوقت بمد لسانو لما يسمع في مساعدات جاي للبلد وحتى انو بتشكون لما تتأخر.

مش حابب احكي كتير في هذا الموضوع بس حبيت اعطي مقدمة للموضوع اللي بدي احكي فيه ... كيف ممكن نعيش بكرامتنا؟

بالنسبة الي انا غير مؤمن ابدا انو الاردن غير قادر على انو يعيش من موارده الطبيعية ... ولما تحكيلي ما في موارد بقولك في الشمس وفي التاريخ وفي الفوسفات واليورانيوم بس الاهم من هدول كلهم في الكفاءات الاردنية اللي بتقدر تستغل كل الموارد المتاحة لتوصل بالوطن لوضع افضل.

وعلى فكرة في دول اقل منا بكتير بالموارد وقدرت تعمل من نفسها شي كبير ... يعني مش صعب نوصل ولا مستحيل بس الموضوع محتاج ارادة شعب وقيادة.

على فكرة اللي مستقل بموضوع الطاقة الشمسية بحكيلو انو في كليفورنيا في الولايات المتحدة معظم هاي الولاية معتمدة على الكهرباء المولدة من الطاقة الشمسية. وعلى فكرة التطور في هذا الموضوع جعل من انتاج الكهرباء على الطاقة الشمسية شي سهل ومقدور عليه حتى من دولة متل الاردن.

اخوي بشتغل بالطاقة الشمسية من سنين وكل ما بحكيلي على هاي المشاريع وعلى الامكانيات اللي ممكن نحصلها منها بحس بغصة بقلبي.

تخيلو مصانعنا لما تكون تشتغل على الطاقة الشمسية ولا تسخن وتبرد عن طريق الطاقة الشمسية قديه هالشي رح يرخص من سعر السلعة ويمكن يخليها تنافس في الدول المجاورة.

تخيل لما البيوت تصير تبريدها وتدفئتها وحتى الطبيخ على الكهرباء اللي هي منتجة من الطاقة الشمسية قديه هالشي رح يوفر علينا من الفاتورة النفطية وقديه رح يوفر على العائلة مصاريف لما تكون تكلفة الكهرباء منخفضة.

تخيل لما نعمل مواصلات عامة على الكهرباء ولما تصير الباصات والقطارات، لا سمح الله طبعا، عم تشتغل على الكهرباء وطبعا لانو الكهرباء انتاجها تكلفتو غير عالية بالتالي المواصلات العامة رح تكون رخيصة فقديه هالشي رح يوفر علينا ويسهل حياتنا.

تخيل لما نصير نحلي مياه البحر بالطاقة الشمسية قديه رح نخفف على حالنا مصاعب شح المياه في البلد.

احنا ممكن نعيش بكرامتنا وبدون ما حد يحملنا جميلة ولا يشحدنا. اكيد الموضوع مش سهل بس مش مستحيل ولا حتى صعب بس بدو متل ما قلت اصرار و ارادة ... بس بالكم قديه في ناس عندها اصرار وارادة؟ قديه في مسؤول مستعد يقدم للبلد؟